السلام عليكم وأسعد الله أوقاتكم بكل خير يا أصدقاء🤍..
موضوع اليوم مختلف كثير عن الأمور اللي اكتبها في العادة، ويمكن تكثر هالمواضيع لأني بديت حملة تنظيف لملفاتي وملاحظاتي اللي في كل مكان 😁، وجا الدور على هالموضوع اللي كتبته لنفسي في المقام الأول لما كنت أشك إن عندي مشكلة في الغدة الدرقية.. وقررت اليوم إني بدل ما أحذفه أشاركه هنا.. لعل في أحد يحتاجه بالقدر اللي كنت أحتاجه ✨..
وش السالفة؟
في يوم من الأيام قال لي الدكتور: سوي تحليل لهرمون الـT4 .. ولمّا كلّمت كذا مختبر، كان يقولون لي كلام أعتقد إنه “تسويقي”: “شوفي هذا التحليل هو الأدق” 🙍🏻♀، ولّا “هذا التحليل لوحده نتيجته غير دقيقة لازم تسوين تحاليل أخرى معه!” 🤷🏻♀..
فاضطريت أقرأ وابحث عن الموضوع لأني أبي أفهم وش موضوع هالهرمونات، وليش أصلا تنطلب؟ وفي حالتي هل اكتفي بـ T4 ولّا أسمع كلام المختبر وأسوي أكثر من تحليل علشان تطلع النتيجة دقيقة 👀؟!
بس للأسف ما كان فيه إجابات واضحة تشرح لي الموضوع بالبساطة اللي كنت أحتاجها (كمريضة في ذاك الوقت).. ما أبي تشخيص.. كنت أبي أفهم الموضوع لا أكثر 🙎🏻♀!
علشان كذا اسمحوا لي أقدم لكم هالشرح البسيط جدًا ، اللي راح ابدأه بالحديث عن الغدة الدرقية وظيفتها ثم ننتقل لهرموناتها بدون تعقيد (📍هذا المحتوى ليس محتوى طبي أو احترافي، ولا يغني أبدًا عن استشارة الطبيب)..
وش هي الغدة الدرقية؟
الغدة الدرقية بكل بساطة هي غدة صغيرة تشبه الفراشة (أو على شكل ربطة عنق حسب تشبيه أحد المواقع اللي بحثت فيها)، موجودة في الجهة الأمامية من الرقبة.
حقوق الصورة: Mayo Foundation for Medical Education and Research. All rights reserved.
ايش وظيفتها؟
سبحان الله على حجمها الصغير إلّا إنها تتحكم بالعديد من الوظائف الجسم المهمة من خلال إفراز هرموناتها اللي راح نتكلم عنها بعد شوي.. ومن الوظائف اللي تتحكم فيها: معدل نبضات القلب، ودرجة حرارة الجسم، وسرعة عملية الأيض، وغيرها من الوظائف الحيوية.
هرمونات الغدة الدرقية:
أولا: هرمون TSH:
هو الهرمون المحفز للغدة الدرقية وتفرزه الغدة النخامية (وهي غدة صغيرة مثل حبة البازلاء تقريبا، موجودة في قاعدة الدماغ)، ووظيفته: يضبّط أمور الغدة الدرقية وينظم إفرازها الهرموني.
ثانيًا: الهرمونات T3 وT4:
هي الهرمونات اللي تفرزها الغدة الدرقية، ويسمى T4 بالثيروكسين وهو الهرمون الأساسي في الغدة، لأن جزء منه يتحول إلى T3.
وش يعني لما يكون الـ TSH مرتفع أو منخفض؟
📍 مهم نعرف إن الموضوع له أكثر من تفسير طبي وهدف هذا المحتوى تبسيط المعلومة، لأن التفسير الدقيق يعتمد على حالة الشخص الطبية وتاريخه الصحي.
لما يكون TSH مرتفع:
فهذا يعني إن الغدة الدرقية ما تفرز كمية كافية من هرموناتها (T4 وT3)!
السؤال المهم: ليش يرتفع الـ TSH؟
لأن الغدة النخامية الله يحفظها تنتبه لأداء الغدة الدرقية الخامل فتروح تزيد من إفراز هرمونها (اللي هو TSH) علشان تحفّز الغدة الدرقية إنها تشتغل وتزيد إفراز الـ T3 وT4.
وتُسمى هذي الحالة غالبًا بـ: خمول الغدة الدرقية.
أما لما يكون TSH منخفض:
فهذا يعني إن الغدة الدرقية تفرز هرموناتها (T4 وT3) بشكل أكثر من اللازم!
طيب ليش ينخفض الـ TSH؟
لأن الغدة النخامية تشوف إن الغدة الدرقية الله يحفظها تشتغل بزيادة (مثل بعض الناس 🌚) وهذا يعني إنها في وضع ما عاد تحتاج لأي تحفيز، وبالتالي تقرر الغدة النخامية إنها تقلل من إنتاج هرمونها المحفز (TSH) وكأنها ترسل إشارة للغدة الدرقية علشان تخفف من إنتاج الـ T3 وT4.
وتدل هذي الحالة غالبًا على: فرط نشاط الغدة الدرقية.
بس.. هذا هو الأمر بكل بساطة!
وقبل أنهي هالتدوينة، خلوني أشارك معكم وحدة من المعلومات اللي أثارت استغرابي أثناء بحثي:
- أحيانًا تكون نسبة TSH طبيعية، لكن T4 منخفض!
وهذا يوضح إن موضوع تفسير النتائج مو بهذي البساطة، ولذلك مهم جدًا إننا ما نعتمد أبدًا على أي محتوى من النت في تشخيص أو قراءة نتائج أي تحليل نسويه.
انتهى، وأتمنى لكم دوام الصحة والعافية 🤍🌿
ملاحظة:
- فقرة الهرمونات كتبتها عام 2022 لما كنت أحاول أفهم الهرمونات وعلاقتها ببعض، واستندت فيه إلى عدة مصادر موثوقة لكنّي ما أذكرها الآن بصراحة؛ لذلك حرصت أعرضه للمراجعة الطبية قبل مشاركته معكم هنا، وشرفتني وأسعدتني الدكتورة: نوف عبد الواحد- تخصص طب طوارئ بمراجعة هذه الفقرة للتأكد من دقة المعلومات الطبية الواردة فيه.
- التدوينة لا تغني أبدًا عن الاستشارة الطبية.
المصادر
حقوق الصورة البارزة: AI-generated for visual purposes | مولدة بالذكاء الاصطناعي لأغراض بصرية.
ندى | Nada 